ງານມະຫາກຳສີມືຫັດຖະກຳລາວ 2012

 

ເພື່ອເປັນການຄຳນັບຮັບຕ້ອນກອງປະຊຸມສຸດຍອດ ອາຊີ-ເອີລົບ ຄັ້ງທີ9 (ASEM9) ທີ່ ສ.ປ.ປ.ລາວ ເຮົາໄດ້ຮັບກຽດເປັນເຈົ້າພາບ, ທາງ ສະມາຄົມຫັດຖະກຳລາວ ແມ່ນຈະໄດ້ຈັດງານ ມະຫາກຳສີມືຫັດຖະກຳລາວ ຄັ້ງທີ 11 ຂຶ້ນຢ່າງເປັນທາງການ, ໃນລະຫວ່າງວັນທີ 1 – 7 ພະຈິກ 2012 ທີ່ຈະມາເຖິງນີີ້, 

ຈຸດປະສົງຂອງການຈັດງານໃນຄັ້ງນີ້ ແມ່ນເພື່ອເປັນການສົ່ງເສີມ ແລະພັດທະນາງານວາງສະແດງດັ່ງກ່າວນີ້ ໃຫ້ກາຍເປັນຕະຫລາດຈຳໜ່າຍຜະລິດຕະພັນ ຫັດຖະກຳ ຂອງຄົນລາວແບບຍືນຍົງ, ມີເອກະລັກສະເພາະ ໃນດ້ານສິລະປະ, ດ້ານວັດທະນະທຳ ຂອງຊາດລາວ ແລະ ພ້ອມທັງເປັນແຫລ່ງທ່ອງທ່ຽວ ໃຫ້ກຸ່ມນັກທ່ອງທ່ຽວ ທັງພາຍໃນ ແລະ ຕ່າງປະເທດ.

ນອກຈາກນີ້ ຍັງເປັນການສ້າງໂອກາດ ໃຫ້ຊາວຊ່າງຫັດຖະກຳລາວ ໄດ້ຮັບຄວາມຮູ້ດ້ານການຕະຫລາດ, ໄດ້ພົບປະແລກປ່ຽນບົດຮຽນ, ປະສົບການດ້ານທຸລະກິດ ເພື່ອນຳໄປພັດທະນາຕົນເອງ ແລະ ທຸລະກິດໃຫ້ເຕີບໃຫຍ່ ຂະຫຍາຍຕົວທັງດ້ານປະລິມານ ແລະ ຄຸນນະພາບຂອງສີນຄ້າອີກດ້ວຍ,

ພາຍໃນງານຄັ້ງນີ້ ແມ່ນຈະໄດ້ມີກິດຈະກຳຫລາຍໆຢ່າງ ໃຫ້ຜູ້ທີ່ເຂົ້າຮ່ວມງານໄດ້ຮັບຊົມເຊັ່ນ: ການເດີນແບບເສື້ອຜ້າອາພອນ ແລະເຄື່ອງປະດັບລາວ, ການສາທິດການຕໍ່າຫູກທໍໄຫມ, ການຝຶກອົບຮົມ ການຜະລິດເຄື່ອງຫັດຖະກຳ, ລວມເຖິງການຈັດການປະກວດ ຜະລິດຕະພັນດີເດັ່ນ ແລະ ກອງປະຊຸມສຳມະນາຕ່າງໆເປັນຕົ້ນ.

ສະມາຄົມຫັດຖະກຳລາວ(ສຫລ)ແມ່ນສະມາຄົມທີ່ໄດ້ຮັບການສ້າງຕັ້ງຂຶ້ນໃນວັນທີ 1 ເມສາ 1998, ໃນໄລຍະເລີ່ມຕົ້ນແມ່ນໄດ້ມີສະຖານະເປັນພຽງກຸ່ມຫັດຖະກຳ, ໂດຍໄດ້ມີສະມາຊິກຈຳນວນ 20 ກວ່າຫົວໜ່ວຍແລະມາຮອດເດືອນກຸມພາປີ 2004 ໄດ້ປ່ຽນສະຖານະຈາກກຸ່ມມາເປັນສະມາຄົມຫັດຖະກຳລາວ ໂດຍໄດ້ມີສະມາຊິກເພີ່ມຂຶ້ນຈຳນວນ 100 ກວ່າຫົວໜ່ວຍ ແລະ ປະຈຸບັນ ມີສະມາຊິກທັງໝົດຫລາຍກວ່າ 120 ຫົວໜ່ວຍ ທີ່ຢູ່ໃນນະຄອນຫລວງວຽງຈັນ ແລະຕ່າງແຂວງ,

ສຫລ ປະກອບມີ 6 ຂະແໜງການຫັດຖະກຳຕົ້ນຕໍ ເຊັ່ນ : ຜະລິດຕະພັນແຜ່ນແພ, ເຄື່ອງປ່າຂອງດົງ, ເຄື່ອງເງິນ ແລະ ວັດຖຸມີຄ່າ, ຜະລິດຕະພັນວັດທະນະທຳ, ຜະລິດຕະພັນຈາກວັດຖຸເສດເຫລືອ ແລະຜະລິດຕະພັນເຄື່ອງປັ້ນດິນເຜົາ, ເພື່ອເປັນການອະນຸລັກ ແລະ ສົ່ງເສິີມຫັດຖະກຳ ທຸກຂະແໜງການຫັດຖະກຳດັ່ງທີ່ໄດ້ກ່າວມານີ້ ສຫລ ແມ່ນໄດ້ລິເລີ່ມຈັດງານມະຫາກຳສີມືຫັດຖະກຳລາວຄັ້ງທີ 1 ໃນປີ 2002 ແລະຈັດງານດັ່ງກ່າວຂຶ້ນ ເປັນປະຈຳທຸກໆ ປີຈົນຮອດປະຈຸບັນນີ້, ເຊິ່ງງານດັ່ງກ່າວນີ້ ຖືໄດ້ວ່າເປັນບຸນປາງໃຫຍ່ ຂອງສະມາຊິກ ແລະ ຊາວຊ່າງຫັດຖະກຳລາວ ໃນຂອບເຂດທົ່ວປະເທດ ທີ່ຈະໄດ້ເອກອ້າງຜະລິດຕະພັນຂອງຕົນ ໃຫ້ທົ່ວສັງຄົມລາວ ກໍ່ຄືສາກົນໄດ້ຮັບຮູ້ອີກດ້ວຍ.


ດັ່ງນັ້ນທາງສະມາຄົມຫັດຖະກຳລາວ ຈຶ່ງຂໍຖືໂອກາດນີ້ ເຊີນຊວນບັນດານັກທ່ອງທ່ຽວທັງພາຍໃນ ແລະ ຕ່າງປະເທດໄດ້ເຂົ້າຮ່ວມຊົມ ແລະ ຊື້ສີນຄ້າຫັດຖະກຳໃນງານຄັ້ງນີ້ ທີ່ສູນການຄ້າລາວ-ໄອເຕັກ, ນະຄອນຫລວງວຽງຈັນ, ສປປລາວ, ໃນລະຫວ່າງວັນທີ 1 -7 ພະຈິກ 2012, ທີ່ຈະມາເຖິງນີ້ ໃນເວລາ 10 ໂມງເຊົ້າ ເຖິງ 8ໂມງແລງ, ໂດຍບໍ່ໄດ້ເສຍຄ່າເຂົ້າຊົມ ແຕ່ປະການໃດ.

Tagged with:
Posted in 2012, Lao Handicraft Festival, Press Release